သက်တောင့်သက်သာ မရှိခြင်း

အားလုံးမင်္ဂလာပါ။

အရင်က သက်တောင့်သက်သာ မရှိခြင်းဆိုတာ ပြောင်းလဲမှု ကြီးကြီးမားမား တစ်ခုကို ပြုလုပ်တာမျိုးကို ထင်ခဲ့ပါတယ်။ ဥပမာ မနက်စောစော ထပြီး လေ့ကျင့်ခန်းပုံမှန်လုပ်ဖို့ ကြိုးစားတာမျိုး၊ အလုပ်သစ်တစ်ခုကို ပြောင်းလုပ်တာမျိူး။

ဒါပေမယ့် ကျွန်တော်ဒီနောက်ပိုင်းမှ သတိပြုမိတာက သက်တောင့်သက်သာ မရှိခြင်းဟာ ကျွန်တော်တို့ အနား စိတ်ထဲဲမှ ပဲ ရှိနေတယ်ဆိုတာပါပဲ။

ဥပမာ ကျွန်တော်ဆိုရင် အားနာတတ်တာ၊ အချိန်ဆွဲတတ်တာ၊ လုပ်သင့်တာကို မလုပ် ဖြစ်နေတာ စတာတွေကလဲ ကျွန်တော်တို့ သက်တောင့်သက်သာ မရှိတာကို မကျော်လွားနိုင်လို့ပါပဲ။ အမှန်တော့ စိတ်သက်တောင့်သက်သာ မရှိမှုကနေ ဖြစ်လာတဲ့ စိတ်ခံစားချက်တွေဟာ ကိုယ့်ကို အမြဲ မှန်ကန်တဲ့ဘက်ကို ဦးတည်ပေးနေတာတော့ မဟုတ်ပါဘူး။

အချို့ဆို လုပ်သင့်တာကို လုပ်ဖို့ကို အချိန်ဆွဲနေတာတွေ့ရပါတယ်၊ ခံစားချက်ကြောင့် ငြီးငွေ့တာကြောင့်ဖြစ်နိုင်ပါတယ်။ ဥပမာ စားပြီးပန်ကန်ကို ချက်ချင်း မဆေးပဲ အချိန်ဆွဲနေတာမျိုး တွေ့ရပါတယ်။ သူ့အတွက် ဒီအလုပ်က ထပ်ခါတစ်လဲလဲ လုပ်နေရလို့ မလုပ်ချင်တော့တာဖြစ်နိုင်ပါတယ်။ ‌ဒါမှမဟုတ် သူကဒီအလုပ်ကို သုံးသပ်လွန်သွားတာကြောင့်ဖြစ်နိုင်ပါတယ်၊ 'ဒီအလုပ်ပဲ လုပ်နေရတယ်၊ ဘာထူးမှာမို့လဲ၊ ငါပဲလုပ်နေရတယ်' စတဲ့ အတွေးတွေကြောင့်လဲ ဖြစ်နိုင်ပါတယ်။

ဒီနေရာမှာ ကျွန်တော်တို့က ငြီးငွေ့ခြင်းဆိုတဲ့ သက်တောင့်သက်သာ မရှိစေတဲ့စိတ်ကို ကျော်လွားနိုင်ဖို့လိုတာပါ။ Oxford ဆရာတော် ဒေါက်တာ အရှင် ဓမ္မသာမိ ရဲ့ တရားတော်တစ်ခုမှာလဲ ငြီးငွေ့စိတ်ကို မတုန့်ပြန်ပဲ ဂရုဏာနဲ့ ရှုပွားပြီး ကျော််ဖြတ်သင့်တယ် လို့ နာကြားဖူးပါတယ်။ ငြီးငွေ့တဲ့စိတ်ကို သုံးသပ် တုန့်ပြန်မှုမှု မလုပ်ပဲကျော်ဖြတ်ရမှာပါ။

ကျွန်တော်တို့ စိတ်သက်တောင့်သက်သာမရှိမှုဟာ ငြီးငွေ့မှု အပြင် တခြား ပုံစံ အမျိုးမျိုးနဲ့ ရှိနေပါသေးတယ်။ ဥပမာ အားနာလွန်တာမျိုး ။ အားနာတဲ့ စိတ်ကို တုန့်ပြန်ပြီး စျေးလျှော့ပေးမိတာ စတဲ့ တုန့်ပြန်မှု လုပ်မိတတ်ပါတယ်။

ကျွန်တော်တို့ စိတ်နဲ့ ခန္ဓာကိုယ်ဟာ တုန့်ပြန်မှုတွေ လုပ်နေပါတယ်။ တုန့်ပြန်မှု နဲ အောင် ‌ကြိုးစား သင့်ပေမယ့်၊ ကျွန်တော်တို့ အဓမ္မကိုတော့ ဓမ္မနဲ့ တုန့်ပြန်ရပါလိမ့်မယ်။ ကိုယ့်ရှေ့မှာ မဟုတ်တာ ပြောရင် မဟုတ်ဘူး မမှန်နေဘူးလို့ တုန့်ပြန်နိုင်ဖို့တော့လိုပါတယ်။

တုန့်ပြန်မှု နဲရင် ဘာ ဖြစ်လဲ? အလုပ်ပို လုပ်ဖြစ်မယ်၊ ပျော်ရွင်မှုပိုမို ရရှိမယ် ထင်ပါတယ်။ (သီအိုရီအရတော့ အလုပ်နိုင်မယ်၊ ပိုမိုပျော်ရွင်နိုင်မယ်လို့ ဆိုပေမယ့် လက်တွေ့က ကျင့်သုံးနေဆဲမို့ 'ထင်ပါတယ်' လို့ ပြောတာ ဖြစ်ပါတယ်။)

အလုပ်ပိုဖြစ်တယ်ဆိုတဲ့ သာဓကတစ်ခုက ကျွန်တော် ပဌါန်း ပဉှာဝါရကို ရွတ်ပွားပူဇော်ဖြစ်ခဲ့တာ ရက်ပေါင်း ၂၀ ကျော်ခဲ့ပါပြီ။ တစ်ခါရွတ်ရင် ၁ နာရီ ၁၅ မိနစ် လောက်ကြာပါတယ်။ ဒီလို ရွတ်ပွားတဲ့ အချိန်မှာ ညောင်းညာ ကိုက်ခဲတာ စတာတွေကို မတုန့်ပြန်ပဲ (မငြီးငြူပဲ၊ သုံးသပ်မှု မပြုပဲ) ပစ္စုန်ပ္ပန်မှာပဲ အာရုံထားပြီး ရွတ်ဆိုမှုကို ပြုပါတယ်။ (နာကျင်ကိုက်ခဲတဲ့ ဝေဒနာကိုတော့ အရှိကို အရှိအတိုင်း ရှုကြည့်ပါတယ်။) ဒီလိုလုပ်တော့ ဒီရွတ်ပွားမှုဟာ ကိုယ့်အတွက် ဝန်ထုတ်ဝန်ပိုးတစ်ခု အနေနဲ့ မခံစားရတော့ပါဘူး။ နောက်တစ်ရက် ထပ်ရွတ်ရင်လဲ စိတ်ထဲမှာ ဘယ်လိုမှမနေပဲ ပေါ့ပေါ့ပါးပါး ရွတ်ပွားနိုင်တာကို တွေ့ရပါတယ်။

_{Image source: https://www.breathehr.com/en-gb/blog/topic/employee-performance/how-to-measure-employee-productivity}

သုံးသပ်မှုတွေ တုန့်ပြန်မှုတွေ နဲသင့်တဲ့အပြင် နောက်တစ်ခု အရေးကြီးတဲ့ အချက်တစ်ခုက ကျွန်တော်တို့ စိတ်ကို ပစ္စုပ္ပန်မှာပဲ ထားထားဖို့ပါ။ အတိတ်ကို ‌တွေးမိရင် နောင်တ ဖြစ်နိုင်သလို အနာဂါတ်ကို စိတ်ရောက်ရင် ပူပန်ရတတ်ပါတယ်။ ကျွန်တော်တို့ ပိုင်ဆိုင်တာ ယခုလက်ရှိအချိန်ဖြစ်တာမို့ အခုပစ္စုပ္ပန်မှာသာ စိတ်ကိုထားပြီးလုပ်ဆောင်နိုင်ဖို့လိုပါတယ်။ လုပ်ဆောင်နိုင်အောင်လဲ လေ့ကျင့်ရပါမယ်။

တစ်ခါတစ်လေ စိတ်သက်တောင့်သက်သာ မရှိတာဟာ မသိမသာ ကိုယ့်စိတ်ထဲ မှာ ရှိနေတတ်ပါတယ်။ ဥပမာ ညနေရောက်ရင် (အရက်သောက်တတ်သူဆို) အရက်ထွက်သောက်ချင်စိတ်ဖြစ်လာတာမျိုး လဲ ဖြစ်နိုင်တယ် ထင်ပါတယ်။ ဒါကို ကိုယ်က တုန့်ပြန်မှုလုပ်ပြီး အရက်ထွက်သောက်မိတတ်ပါတယ်။

မိတ်ဆွေတို့ကော ဘယ်လိုမျိုး စိတ်သောင့်သက်သာမရှိတာတွေရှိကြလဲ။ သူတို့ကို ဘယ်လို ရင်ဆိုင် ဖြတ်ကျော် ဖြစ်လဲ။

အားလုံးကို ကျေးဇူးတင်ပါတယ်။

@princekham
Myanmar
2nd June 2023